溫室港豬 vs《千與千尋》巨嬰?



大家有睇《千與千尋》呢套戲就知,當中有個好討人厭嘅角色,就係油屋主人湯婆婆嘅孩子寶寶,著住紅肚兜嘅嬰兒,外形卻比成年人仲要巨大,係個名副其實嘅「巨嬰」。「巨嬰」就好似我哋眼中嘅港豬,俾湯婆婆過份咁溺愛,無疑係被寵壞嘅。喺自己嘅房間入面,佢就係規矩,有自己嘅玩具、零食,一切都係圍住自己而轉。


被溺愛嘅「巨嬰」,因為長期活喺自己嘅世界,產生自我中心嘅性格,完全唔理人感受,遇到困難只知道要喊,怪責別人進入自己嘅世界,聽唔入人哋講嘅嘢,完全唔想去改變或進步,只會令房間愈來愈細,最後連自己都裝唔落。就好似香港版嘅「巨嬰」,就算年紀去到幾大,眼中只有自己,自己睇嘅嘢永遠最長遠,唔容納人哋嘅批評或建議,埋手喺封閉保守嘅世界,令到大家愈來愈見唔到香港嘅未來,香港亦將會喺「巨嬰」手上毀於一旦。



《千與千尋》嘅「巨嬰」相信自己係自由嘅,只係內心孤獨而已,但其實呢種係一個無人房間入面嘅所謂「自由」,又係咪真係「自由」呢?


我哋會否定嘅,呢個自由只係湯婆婆賦予嘅「自由」,並唔係真正嘅自由。喺呢個框框入面「巨嬰」只係愚昧咁接受湯婆婆為佢準備嘅一切,連選擇嘅機會都無嘅時候,又談何自由呢?喺香港,情況更差,「巨嬰」一味食盡香港嘅資源,逆來順受,完全唔理後代或未來會否受到「湯婆婆」剝削,只會關注眼前利益,其實係自私又無知,係不負責任嘅行為。咁又係嘅,「巨嬰」個腦都未發育好。


當錢婆婆將「巨嬰」變成小老鼠嘅時候,「巨嬰」無大哭大鬧,因為咁樣活動反而靈活咗好多,「巨嬰」真係第一次感受到「自由」,都因為咁開始咗佢有生以來第一次奇妙嘅「成長旅程」,見識更多嘅事同人。其實俾一個機會自己去學習同進步,吸納新事物,用唔同角度去睇同一件事,得着反而會更加多。到咗呢個時候,乜仲有需要繼續做隻籠中豬咩?

聯絡點子

想收到點子的最新消息及資訊,請立即訂閱我們的電子通訊。
  • White Facebook Icon
  • 白色的Instagram圖標

© 2020 Powered by 點子

Proudly created with passion
版權所有