《數碼暴龍 LAST EVOLUTION 絆》之「被選中嘅細路」寄語

更新日期:5月 29



《數碼暴龍 LAST EVOLUTION 絆》近日終於上映,作為系列嘅20周年紀念作品加上係完結篇,只要你細個有鍾意過《數碼暴龍》,呢套嘢絕對值得入場支持!


(以下內容涉及少量劇透)


開場無耐,戰鬥畫面就已經有驚喜,節奏緊湊而不失流暢,幾位第一代主角跟拍檔數碼精靈合作,毫無冷場。當中最高潮位置一定係亞古獸嘅「原裝」進化過程,加上全新編曲嘅《Brave Heart》,跟住再感動播出初代版嘅《Butter-fly》,單單開場幾分鐘就已經成為電影最精彩熱血嘅部分之一。


故事前段交代太一同大和喺燒肉店飲酒,講到其他戰友都各自有明確嘅目標,唯獨只有數碼精靈「冇改變」;亦因為各自都有自己嘅生活,數碼精靈都冇好似以前咁跟住各人。與此同時佢哋收到求助要抗敵,再被告


知殘酷嘅事實──當「被選中嘅細路」變成大人,佢哋嘅拍檔數碼精靈將會消失。如果唔戰鬥就無法拯救同伴,但強行進化戰鬥只會更快同拍檔離別,呢個宿命正正就係故事嘅主軸。太一同大和嘅心理受到前所未有嘅衝擊,佢哋仲因為想法唔同而產生爭執,最後推佢哋一把嘅反而係「冇改變」嘅拍檔。正因為數碼精靈一直係最了解人類同伴嘅存在,佢哋單純而堅定嘅樂觀態度令太一同大和重拾「初心」,一齊攜手戰鬥至最終勝利。



「無論點我哋都要向前行,只有向前行先會進步」


幾位電影主角中,太一同大和可以講係比較貼地(只因光子郎實在太離地──社長),佢哋都對未來存在猶疑同不安,同依家香港一班「被選中嘅細路」一樣前路未明,仲要面對眼前一個又一個嘅危機;但正如太一佢哋終極覺悟一樣,雖然將會面對拍檔嘅離別,但拯救大家先至係最重要嘅任務,「只有向前行先會進步」。相信呢個都係對現時一眾年青人嘅寄語,理念雖然好old school不過方向好正確,用《數碼暴龍》去包裝絕對更受落。


「未必能夠改變宿命,但係命運係可以改變」


有啲人會選擇沉醉過去美好嘅回憶之中,相對扼殺咗未來所有嘅可能性、錯失前進嘅動力;而有啲人會選擇背負住回憶,忍著傷痛不斷往前進發,為自己嘅未來創造可能──呢個就係敵人同太一佢哋之間最大嘅分歧點,亦係《LAST EVOLUTION》最撼動人心嘅部分。因為喺度煩惱、困惑、作戰嘅,唔單止只係有太一、大和、亞古獸、加布獸佢哋,仲有喺大銀幕前嘅各位。


加上最後催淚嘅結尾──

「太一⋯⋯你長大咗呢。」

「因為睇住你哋長大,就已經好開心喇。」


全片都不斷喺「成長」、「可能性」、「回憶」之間來回穿梭。「成長」路上,人必須要不停咁作出選擇。而每個選擇,就好似決定緊自己未來嘅「可能性」一樣。到底係要陷入恐懼、怯懦,任由自己沉浸喺美好嘅「回憶」之中?定係緊握勇氣徽章,昂首闊步,作出「LAST EVOLUTION」?


今次嘅動畫電影除咗係畀系列粉絲嘅一個完美結局,同時都帶出數碼世界一個全新嘅開始將會喺未來同所有人一齊向前行。一代嘅終結,亦代表新一代嘅開始,「絆」隨大家有更美好嘅明天!

45 次瀏覽

聯絡點子

想收到點子的最新消息及資訊,請立即訂閱我們的電子通訊。
  • White Facebook Icon
  • 白色的Instagram圖標

© 2020 Powered by 點子

Proudly created with passion
版權所有